D’ Mäntigsfroue göh go reise…..

Am 31.8.2024 am 20 ab sächsi träffe mir üs am Bahnhof. Aui no mit Schlaf i de Ouge überchöme mir s passende T-shirt Sloth Hiking Team – we will get there when we get there Faultier Wandergruppe – mir si dert, wemer dert si. Scho uf dr Bahnreis hei mir e gueti Strecki z Fuess zrügg gleit. Üsi reservierte Plätz si immer abwächsligswiis am Afang oder am Ändi vom Zug gsi u so simer hin u här. Z Olte uf Gleis 12 – Tessin? Z Arthgoldau umstige – Nid Tessin? Nei nid is Tessin. Womer de z Morschach si usgstige isch für üs unwissende schnäu klar gsi, mir göh i Swiss Holiday Park. Dobe acho düemer üses grosse Gepäck zwüschelagere u mache üs z Fuess oder mit em Bus ufe Wäg zur Seilbahn Morschach Talstation vo dört us trenne sech d Wäge wider i zwöi Grüppli die wo ganz ufe loufe u die wo d Seilbahn näh. Perfekt fürs Mittagässe träffe mir üs aui wider ufem Stoos. Guet isches gsi. No immer früsch u munter entscheide mir üs s nächschte Bähndli ufe Klingenstock z näh. Dört gniesse mir d Ussicht u o dr Gipfuwy darf natürli nid fähle. Gmüetlich mache mir üs wider zrügg is Hotel, dört heimer jetzt no d glägeheit goh z Bädle, aber zerscht wärde natürli d Zimmer bezoge. Nachdäm mir üs aui Abküehlt hei, deu mit Wasser deu mit Apéro, mache mir üs bereit fürs z Nachtässe. Im ne unschiinbare italiänische Restaurant hei mir dr gröscht Apérol Spritz übercho wo mir je gseh hei. S ässe isch super fein gsi u mir hei üs köschtlich amüsiert. Es isch e wunderbare Abe gsi u es paar vo üs hei dä vorem is Bett gah no mit em ne Schlummertrünkli abgschlosse. Das isch gar nid so eifach gsi, bis mir de öpis gfunde hei, womer no eis chöi näh. U das isch im Zentrum vo au dene begeschterte Chind und Jugendliche gsi bim Billiarde, Bowle oder Kard fahre. Das isch mau e fuer gsi.

Am nächschte Morge hei mir üs es usgibigs Z morge gönnt bevor mir üs Heldehaft is Minigolf gstürzt hei. Es isch sehr luschtig gsi mit üs. Mir si aui nid würkli Profis aber hei es riise Gaudi gha. Nach däm luschtigschte Minigolfspiel wo mer aui äuä je gha hei, hei mir üs no mau e Chübu oder zwe Apérol Spritz gönnt i däm super Reschti womer z Nacht gha hei. Nach dere Erfrischig hei sech üsi Wäge no mau trennt, ei Teil isch z Fuess a Bahnhof u die andere si mit em grosse Gepäck mit em Bus gange. Auso das wär emu dr Plan gsi. Leider heisi, werum ou immer, dä Bus wo mir hei wöue näh usem Verkehr zoge. 5 minute bevor är hätt söue cho, hets im App plötzlich gheisse «Verbindung fällt aus». Churz hetsich ufregig breit gmacht, Idee wie mir jetzt mit däm ganze Gepäck rächtziitig a Bahnhof chöme si diskutiert worde, mir hei üs mit de Läufer in Verbindig gsetzt. Schlussändlich, heimer kei Lösig gfunde bis dr nächscht Bus cho isch. Das isch ou gange heimer gmerkt u obwou mer när guet e Stund später in Morschach wäg si, simer nur e haub Stund später aus planet wider in Utzenstorf glandet si.

WE WILL GET THERE WHEN WE GET THERE