Früsch und munter starte am Samstigmorge 8 Turnerinne z Utzistorf ihre Ausflug «is Blaue». Bereits bi dr nächste Station stiege 2 witeri und in Bigle nomal 1 Reiselustige zu. In Spiez wird dr Rucksack agleit, wieso hei äch äs paar Turnerinne so ne schwäre? Mir gö doch nume hüt u Morn uf Reise! Psst, mit wüsses ja scho, schliesslich hei ja alli ä Zinnbächer bi sich😊

Dr Spaziergang am See entlang mit tolle schattegäbende Böim, chliene Büchtli, wo sich super zum meditiere eigne (hammmmm), und d Gschicht vom «Wunder von Bern» schaffe mir im Nu. Nach eme feine Kafi mit Gipfeli geihts aufs Schiff, oder uf ä Bus. Ziel: Beatushöhlen! Jetz heissts:» Dr Puls ufejage» bim Ufstieg zur Höhli. D Besichtigung vo dr Höhli isch sehr Interessant und mir stuune nid nume über die schöne Nischene sondern ou über die «fyne Pflänzli oder Moos» wo sich dank em künstleche Licht im Bärginnere chöi entfalte.

Gstärkt mit em Zmittag us em Rucksack, stiege mir nach Sundlauenen ab, «müesse» aber immer wieder ufeluege zum «Vogunächst» im Fels obe, äs isch sooo schön. Mit em Bus geihts Interlaken zue, und wo het är halt? Natürlich a dr Kante H !! (Uskunft cha Barbar gäh)😊. Souverän lotse üs nähr die 2 Reiseleiterinne dür Interlake und plötzlich stöh mir vorere nostalgische Seilbahn von 1906, aber «die alte Dame» isch fit , sie bringt üs fählerfrei uf d«Heimwehfluh». Hei isch das schön daobe, vo üs isch no niemer da obe gsi und äs git viel zgseh und zbestuune und usprobiere, aber hoppla alles isch de nid für üs, wüll mir scho alle 12 jährig si gsi!! Abwärts geihts nähr per Rodel oder zu Fuss dür ganz äs schöns Wäldli.

Langsam wird’s Zyt, dass mir üsi Unterkunft ufsueche. In Unterseen quartiere mir üs im «Swiss Chalet» i. Viel Zyt hei mir nid üsi Zimmer , mit Galerie, zgniesse, denn s Nachtässe wartet. Dr Wirt isch chli überrascht, dass da 11 Froue arücke, i gloube är isch nid so erfröit gsi . Si Mine het sich aber schnäll gänderet wo mir dr Apéro bstellt hei; luschtig het är gfunge wo du no Eini het «offnigs Hahnewasser bstellt. Mir si ä luschtegi Rundi gsi und am Schluss hets gheisse :» Viele Dank, dir sit tolli Gäscht gsi».Bim aschliessende Umhärschlendere hei mir d «Bounty-Bar» bsuecht. D Bardame isch chli überrascht gsi wo mir grad Theke gfüllt hei, 11 Froue, das heig sie no nie gha und dr einzig Maa (Belgier) wo dinne isch gsi het süferli gfragt ob das ä «Frouebar» sig. D Bardame isch emu du äuä ihri «alti» War losworde😉

Dr Schlummerdrunk , natürlich äs Verventee, hei mir i dr huuseigene Bar gnosse.

Ab de 8te trudle mir zum Zmorge i. Rächt früsch gseh mir us und fröie üs uf ä 2. Tag, was passiert äch hüt? Gnue Zmorge näh, schla i vor, wär weiss wie steil oder wie mängi Stund hüt uf üs wartet.

Mir loufe alles ar Aaare na, gniesse die früschi Luft, luege die schöne pflegte Gärte a, Aenteli schwümme d Aare ab und wärde ungerwägs mit Salat gfüetteret und schwups stöh mir wieder vore Bahn. Hüt geihts chli länger obsi, mir fahre uf ä Harder, chli weniger romantisch und chli mit weniger Bewegigsfreiheit. Die Ussicht – eifach fantastisch, links dr Thunersee, rächts dr Brienzersee, ir Mitti Blick auf Eiger , Mönch und Jungfrou . Mir heis doch so schön i üsem Ländli, me muess gar nid weiss dr Güggel wohi fahre.

Jetz geht’s uf d Rundwanderig, dr Schaffner vom Bähndli het gseit:» Froue föt de dr Rundwäg linksume a, das isch besser!» Auso mache mir das, über Wurzle, Steine und Sonschtigs geihts zersch rächt steil ufe, aber für üs kei Problem. Mir gniesse dä Rundwäg – psst, da bewegt sich öppis, isch äch das ä Steibock – nei cha nid si, dä het ja ä rote Rucksack a😊. Nach em Rundgang gselle mir üs zu üsne «Rucksackhüeterinne» und gnämige üs öppis Feins. Bi dr Abfahrt mit em Bähndli hei mir zvorderscht dr Fänschterplatz, dank «üsem» Schaffner wo so gueti Tipps git. Nach däm «Höheflug» loufe mir am Bahnhof zue. Da gits viel zluege, äs isch «Märit» und het vieli Ständ mit so Krimskrams, üs interessiert aber nume eine, das isch – der Glacestand.

Zfriede stiege mir i Zug und fahre heizue äs isch ä heissi Heireis, ab Thun mit dr BLS hei mir wieder die ältischte Wäge, d Klimaalag louft uf Hochture aber äs heizt meh, Sunnestore hets keini und uftue isch sowieso Wunschkonzärt. Guet hei mir no Getränk derbii.

Zfriede chömme mir dahei a, mir hei 2 ganz schön Täg , gspickt mit viele Ueberraschige, dörfe erläbe dank em grosse Isatz vor Conni und Dajana, dir heit das super gmacht, merci viel mal.